|
هاض الشعر ياصاحبي فـي ليلـة الاثنيـن
والبيـت اقولـه علـى الجمـهـور وارده
|
|
البيـت اقـولـه ولايحتاجـلـه تـوزيـن
طبـق التشابـه مـع التوقـيـع واعتـمـده
|
|
والشاعـر اللـي تعثـره كسـرة التنويـن
اكيـد يسمـع كــلام الـنـاس ويـحـده
|
|
لـو الشعـر يحتـاج شاعـر مـن الثقليـن
عثمان انا شاعر بني برغوث اخـو سعـده
|
|
وان كـان مايقـرا قصيـدي ابـو عينـيـن
ماهـو كفـو يسمـع قصـيـدي وينتـقـده
|
|
واللي حصل ياصاحبي وحده مـن الثنتيـن
امـا قـدر والا علينـا الـنـاس متعـمـده
|
|
والضيقه اللـي تجينـا بيـن حيـن وحيـن
يالله عسـاهـا مــع الايــام مبـتـعـده
|
|
واللـي نسانـا تـرا ماهـو مـن الغاليـن
جعـل الزمـن والقرايـب كلهـم ضــده
|
|
خل ينفعـه صاحبـه هـذاك ابـو وجهيـن
اللـي يـوزه عـلـى الغالـيـن ويـحـده
|
|
وان كان ناوي على الفرقـا قبـل شهريـن
فرقـاه عنـدي مثـل فرقـا اخـو حمـده
|
|
ماشره على ناس(ن) تحب تلعب على الحبلين
ناس(ن) زعابيط(ن) مـع الانـذال منخمـده
|
|
واللي يحسـب البشـوت تعـرب الجديـن
ياجعـل بشتـه قصيـر(ن) مايجـي قــده
|
|
ان كـان يبغـا يـقـارن بينـنـا الاثنـيـن
الفـرق واضـح بيـن جـدي وابـو جـده
|
|
من الكرم جدي شعـل للضيوفـه الناريـن
وباب الكـرم للضيـف والمحتـاج ماسـده
|
|
حنا نحب الخيـر واهـل الخيـر والوافيـن
لكـن اذا شفنـا الغلـط ننهـيـه ونــرده
|
|
واللـي علـى غايتـه يتبـع دروب الشيـن
نوقـف علـى غايـتـه ننهـيـه ونـلـده
|
|
حنـا تربينـا نعـز الديـن واهـل الـديـن
يـوم الـردي امـه عـن الاسـلام مرتـده
|
|
حنـا لـنـا قاسيـتـك يالـزمـان تلـيـن
وبالطيـب سمعتنـا مـع العربـان ممتـده
|
|
حنـا ورثنـا الطيـب والطيـب للطيبـيـن
من جدنا برغـوث والامجـاد مـن مجـده
|
|
وعيسـى ورثنـا علـى ايدينـه الثنتـيـن
امجـاده اللـي مــع العـربـان منـعـده
|
|
وخليف راعي الطيب مثل الكريـم حسيـن
وعامر اخو عميره لـه المجـد مـن قـده
|
|
ومخلف اخو سعده لـه بالمرجلـه دربيـن
درب الشجاعـه والكـرم مايختلـف عنـده
|
|
علـى الفخـر والطيـب والعـز مولوديـن
وارواحنـا للـعـز والامـجـاد منـولـده
|
|
ماكننـا الا عـلـى الـشـدات مخلوقـيـن
الله خلـق كـل برغوثـي علـى الـشـده
|
|
واللـي يقـارن معانـا وزنــه بوزنـيـن
يبطي ولايوصـل مواصيـل اخـو سعـده
|
